රාජ්‍ය භාෂා උල්ලංගණය කරන මෙරට දේශීය සහ විදේශීය සමාගම්වලට එරෙහිව නව නීති

ඉන්දික ශ්‍රී අරවින්ද

ලබන වසරේ සිට මෙරට පවත්වාගෙන යන පෞද්ගලික විදේශීය හෝ දේශීය ආයතනයන්හි නාම පුවරු මෙරට භාවිතා කරන ප්‍රධාන භාෂාවන්ගෙන් පමණක් භාවිතා කරන ලෙසට නව නීති ගෙන ඒමට රාජ්‍ය භාෂා කොමිසන් සභාවේ අවධානය යොමු වී තිබේ.

එම කොමිසමේ සහකාර අධ්‍යක්ෂ සිවප්‍රගාෂන් මදිවානන් මහතා ප්‍රකාශ කළේ මෙරට පවත්වාගෙන යන ඇතැම් චීන සමාගම් ඔවුන්ගේ භාෂාව යටතේ නාමපුවරු ප්‍රදර්ශණය කිරීම ශ්‍රී ලංකා ආණ්ඩුක්‍රම ව්‍යවස්ථාවට පටහැනි බවයි.
මෙරට ආණ්ඩුක්‍රම ව්‍යවස්ථාවේ 4 වැනි පරිච්ඡේදයේ ඒ සම්බන්ධව පැහැදිලිවම සඳහන් කර තිබේ.

ව්‍යවස්ථාවට අනුකූලව යම් නාම පුවරුවක් මහජනයාට ප්‍රදර්ශනය කරන්නේ නම් සිහල සහ දෙමළ භාෂාවට ප්‍රධාන තැනක් ලබා දිය යුතු අතර ඉංග්‍රීසි භාෂාව සන්ධාන භාෂාවක් බැවින් ඒ සඳහා තෙවැනි තැන ලබා දිය යුතු වෙයි.
පසුගිය රජය පාලනය තුළදී මහා පරිමාණ චීන ව්‍යාපෘතියක් වන පුත්තලමේ අරුවක්කාරු කසළ අංගනයේ චීන භාෂාවට මුලික තැනක් ලබාදෙමින් නාමපුවරු ප්‍රදර්ශණය කිරීමක් සම්බන්ධව පැමිණිල්ලක් රාජ්‍ය භාෂා කොමිසන් සභාව වෙත ලැබුණි.

එම අවස්ථාවේදී එවකට රාජ්‍ය භාෂා අමාත්‍යවරයා ලෙස කටයුතු කළ මනෝ ගනේෂන් මහතා ඒ ගැන චීන රජයට තම විරෝධය පළකර කළහ. ඒ පිළිබඳව අවධානය යොමු කරමින් එම ස්ථානයට ගොස් සොයා බලා එය නිවැරදි කිරීමට පියවර ගන්නා ලෙසට අදාල කසල අංගනයේ කළමනාකාරිත්වයට දැනුම් දීමෙන් අනතුරුව එය නිවැරදි කිරීමට උපදෙස් ලබා දී තිබුණි.

මේ වනවිට මෙරට භාෂාවන් උල්ලංගණය වන ආකාරයේ චීන සහ අරාබි යන භාෂාවලින් නාම පුවරු ප්‍රදර්ශණය කිරීම සම්බන්ධයෙන් පැමිණිලි කිහිපයක්ම රාජ්‍ය භාෂා කොමිසන් සභාව වෙත ලැබී තිබේ. මේ නිසා පෞද්ගලික ආයතනයන් විසින් භාෂා උල්ලංගණයට එරෙහිව නීතිමය පියවර ගැනීමට ආණ්ඩුක්‍රම ව්‍යවස්ථාව තුළ ප්‍රතිපාදන නොමැති බැවින් රාජ්‍ය භාෂා පනත සංශෝධනයට අවධානය යොමු වී ඇතැයි සිවප්‍රගාෂන් මදිවානන් මහතා පවසයි.

රාජ්‍ය භාෂා ප්‍රතිපත්තිය සම්බන්ධයෙන් සිවිල් සංවිධාන දැනුවත් කිරීමේ වැඩසටහනක් රට තුළ ක්‍රියාත්මක කිරීමට සැලසුම් සකස්කර තිබුණත් දැනට රට තුළ කොවිඩ් වෛරසය ව්‍යාප්තිය හේතුවෙන් එම වැඩසටහන ක්‍රියාත්මක කිරීමට නොහැකි වී ඇත. රාජ්‍ය භාෂා පනත සංශෝධනය සඳහා රාජ්‍ය සේවා, පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් මහතාගේ ද අනුමැතිය දැනටමත් හිමිව තිබේ.

ඒ අනුව ඉදිරියේදී එම පනත සංශෝධනය කිරීමෙන් අනතුරුව පෞද්ගලික ආයතනයන්වලටද එරෙහිව නිතිය ක්‍රියාත්මක කිරීමට පියවර ගන්නා බව ඔහු පවසයි. දැනට රාජ්‍ය සහ අර්ධරාජ්‍ය ආයතනයන්හි සියළුම ලිපි ලේඛණ මෙන්ම නාම පුවරු සකස් කර ඇත්තේ මුලික භාෂාවන්ට අදාල දිය යුතු තැන ලබා දෙමින් බවද ඔහු පැවසිය.

මෙහිදී උතුරු – නැගෙනහිර පළාත්හි වෙසෙන ද්‍රවිඩ සහ මුස්ලිම් ජන සංයුතිය අනුව ද්‍රවිඩ භාෂාවට මුලික තැන ලබා දෙමින් රාජ්‍ය සහ අර්ධරාජ්‍ය ආයතනයන්හි නාමපුවරු ප්‍රදර්ශනය කිරීමට රාජ්‍ය භාෂා කොමිසන් සභාව අවසර ලබා දී ඇති බවයි රාජ්‍ය භාෂා කොමිසන් සභාවේ සහකාර අධ්‍යක්ෂ සිවප්‍රගාෂන් මදිවානන් මහතා වැඩිදුරටත් ප්‍රකාශ කළේය.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.