ජන්දය ගැන පාටලී නිවැරදි තක්සේරුවක් ලබා දෙයි

අපේක්ෂකයා කවුරුන් වුවත් 2020 ජනාධිපතිවරණය ජයග්‍රහණය කිරීමට නම් ලක්ෂ 65 – 70 ත් අතර ඡන්ද සංඛ්‍යාවක් ලබාගත යුතුව ඇතැයි මහ නගර සහ බස්නාහිර සංවර්ධන අමාත්‍ය පාඨලී චම්පික රණවක මහතා අවධාරණය කරයි.

මෙවර ලක්ෂ 158 ක් ඡන්දය ප්‍රකාශ කරන අතර ඉන් වලංගු ඡන්ද අනිවාර්යයෙන්ම ලක්ෂ 135 – 140 ත් අතර ප්‍රමාණයක වන හෙයින් අභියෝගාත්මක ඡන්ද ප්‍රමාණයක් නොමැතිව ජයග්‍රහණය කළ නොහැකි බවයි අමාත්‍යවරයා සඳහන් කරන්නේ.

ඡන්ද හැසිරීම නිවැරදිව තක්සේරු කළ යුතු අතර එසේ නොවුණහොත් 2015 මහින්ද රාජපක්ෂ මහතාට වූ දෙය අත්විඳින්නට සිදුවන බව රණවක මහතා කියා සිටියි.

මහානගර හා බස්නාහිර සංවර්ධන අමාත්‍ය පාඨලී චම්පික රණවක මහතා මෙම අදහස් පළකර සිටියේ, ශ‍්‍රී ලංකා දුම්රිය දෙපාර්තමේන්තුවේ කාර්යාල ගොඩනැගිල්ල සහ කර්මාන්ත ඒකකය සඳහා මුල්ගල තැබීමේ අවස්ථාවට එක් වෙමිනි.

“2014 සැප්තැම්බර් මාසේ තමයි ඌව පළාත් මැතිවරණය තිබ්බේ. එහි ප‍්‍රතිපළ නිකුත් කෙරෙන කොට උදේ පාන්දර 5.00යි. ඒ වෙලාවේ දුරකතන ඇමතුමකින් එකල ජනාධිපති මහින්ද රාජපක්ෂ මැතිතුමා අපව කැඳෙව්වා. එහිදී බැසිල් රාජපක්ෂ මහත්මයා අපට ප‍්‍රසන්ටේෂන් එකක් පෙන්නුවා. එහි තිබුණේ පළාත් නමයෙම ඡන්ද ප‍්‍රතිඵල නිකුත් කෙරිලා තිබෙනවා. එක්සත් ජනතා නිදහස් සන්ධානය ලක්ෂ 50 ක් ඡන්ද අරන් තිබෙනවා. එක්සත් ජාතික පක්ෂය ලක්ෂ 24 යි, ජනතා විමුක්ති පෙරමුණ ලක්ෂ තුනහමාරයි. ෆීල්ඩ් මාර්ෂල් සරත් පොන්සේකාගේ ප‍්‍රජාතන්ත‍්‍රවාදී පක්ෂය තුන්ලක්‍ෂ හැත්තෑපන් දහසයි. දෙමළ සන්ධානය ලක්‍ෂ පහයි. අපි ලක්ෂ පනහයි. මුළු ඒකාබද්ධ විපක්ෂයම එකතු කළහම ලක්‍ෂ 36 යි කියලා කිව්වා. ඊට පස්සේ මහින්ද රාජපක්ෂ මහත්මයා නැගිටලා කිව්වා මම ඉක්මනින් ජනාධිපතිවරණය තියන්න යනවා ලැහැස්ති වෙන්න කියලා. ලක්ෂ පනහක් එක්සත් ජනතා සන්ධානයේ, විපක්ෂයේ සියලුම දේ එකතු කළත් ලක්ෂ 36 නිසා ඉතාම පහසු ජයක් තියෙනවා වගේ හැමෝම බොහොම සතුටින් විසිරිලා ගියා.

නමුත් එහිදී තමන් වචනයක්වත් කතා නොකළ අතර පසුව ඒ ගැන රාජපක්ෂ මහතා විමසූ අවස්ථාවේදී බව තමන් ඉතා පැහැදිලිව රාජපක්ෂ මහතාගේ පරාජය සම්බන්ධයෙන් පැවසූ බව රණවක මහතා ප්‍රකාශ කරයි.

LEAVE A REPLY

Please enter your comment!
Please enter your name here