නියං ආපදා තත්ත්වයට මුහුණදීමට නව වැඩපිළිවෙලක්

සාමාන්‍ය උෂ්ණත්වය වැඩිවීමත් නියං තත්වයක් වර්ධනයවීමත් හේතුවෙන් පානීය ජලය ලබා ගැනීම, බල ශක්ති අර්බුදයක් පැන නැගීම මෙන්ම වනාත්තර ගිනි ගැනීම වැනි ව්‍යසන තත්වයන් වාර්තා වී ඇති බව රාජ්‍ය පරිපාලන සහ ආපදා කළමනාකරණ අමාත්‍ය රංජිත් මද්දුම බණ්ඩාර මහතා පවසයි

අමාත්‍යතුමා මේ බව පැවසුවේ පවතින ආපදා තත්වය පිළිබදව ජනතාව දැනුවත් කිරීම සදහා අමාත්‍යාංශ ශ්‍රවනාගාරයේ දී පැවති මාධ්‍ය සාකච්ඡාවකදියි.

ආපදා සම්බන්ධ යම් තොරතුරක් වෙතොත් ආපදා කළමනාකරණ මධ්‍යස්ථානයේ අංක 117 වෙත ඇමතුමක් ලබා දී ඒ පිළිබදව දැනුවත් කිරීමට කටයුතු කරන මෙන් ද ඉල්ලා සිටින ලදී.

එසේම ජනතාවගේ ඉල්ලීම් වලට ප්‍රතිචාර දැක්වීම සදහා සෑම දිස්ත්‍රික්කයකම ස්ථාපිත දිස්ත්‍රික් ආපදා කළමනාකරණ ඒකක සමග ත්‍රිවිධ හමුදාව, පොලීසිය සහ සිවිල් ආරක්ෂක දෙපාර්තමේන්තුව ඇතුලු සියලු අංශ ඒකාබද්ධ කර ක්‍රියාත්මක කිරීමේ වැඩපිළිවලක් සකස් කර ඇති බවද අමාත්‍යවරයා පවසයි.

දැනටමත් අම්පාර, යාපනය, වව්නියාව, පොලොන්නරුව, කුරුණෑගල, කලුතර, මහනුවර, මාතලේ, මාතර, ගම්පහ, පුත්තලම, කෑගල්ල සහ රත්නපුර යන දිස්ත්‍රික්ක 13 කට බවුසර් මගින් ජලය බෙදාදීමට කටයුතු කරන බවත් හදිසි ආපදා අරමුදලට අමතරව පානිය ජලය බෙදා දීමට අවශ්‍ය මුදල් මේ වන විටත් එම දිස්ත්‍රික්ක වෙත ලබාදීමට කටයුතු කර ඇති බවත් අමාත්‍යතුමා කියා සිටියි.

එසේම මේ වන විට දිවයින පුරා අවශ්‍යතාවය මත ප්‍රයෝජනයට ගැනීම සදහා ජල බවුසර් 207 ක් බෙදා දී ඇති බවත් කලු ගංගාවේ ජලයට මුහුදු ජලය මිශ්‍රවීම නිසා කලුතර දිස්ත්‍රික්යේ ඇතිවී ඇති ජල ගැටලුවට පිළියමක් වශයෙන් ත්‍රිවිධ හමුදාව සිවිල් ආරක්ෂක දෙපාර්තමේන්තුව සහ පොලීසිය එක්ව ජලය බෙදා දීමට කටයුතු කරන බවත් ආපදා කළමනාකරන අමාත්‍යවරයා වැඩිදුරටත් ප්‍රකාශ කරයි.

LEAVE A REPLY

Please enter your comment!
Please enter your name here