Thu. Jun 27th, 2019

Colombo Gazette – Sinhala

News, views and more

ගොවි ජන ජීවිතය නගා සිටුවිමට සෑම පියවරක්ම ගන්නවා: ජනපති


සොබාදහමේ ගැටලූ සමඟ අද ගොවි ජනතාවට අභියෝග රැසකට මුහුණදීමට සිදුව ඇති බව ජනාධිපතිතුමා පවසයි.

කාලගුණික, දේශගුණික විපර්යාස තුළ මේ රටේ ගොවි ආර්ථීකයේ කඩාවැටීම පසුගිය වසර කිහිපය තුළ ඉතා බරපතළ බව ප්‍රකාශ කළ ජනාධිපතිතුමා සොබා දහමේ බලපෑම රජයට වෙනස් කළ නොහැකි වුවත් කෘෂිකර්මාන්තයේ සංවර්ධනය මෙන්ම ගොවි ජන ජීවිත නඟා සිටුවීම වෙනුවෙන් ගතහැකි සෑම පියවරක්ම ගන්නා බව ප්‍රකාශ කළේය.

ජනාධිපති ගරු මෛත්‍රීපාල සිරිසේන මැතිතුමා මේ බව සඳහන් කළේ ඊයේ පස්වරුවේ කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ පැවති “ගොවිජන අභිමන් 2018” ජනාධිපති සම්මාන උලෙළ අමතමිනි.

ගොවිජන සංවර්ධන නිපුණතාවන් උදෙසා විශිෂ්ටයන්ට පිදෙන කාර්යය සාධන ජනාධිපති සම්මාන උලෙළ ප්‍රථම වතාවට ගොවිජන සංවර්ධන පාර්තමේන්තුව විසින් සංවිධානය කර තිබුණි.

ගොවිජන සංවර්ධන දෙපාර්තමේන්තුවේ ඉදිරි වසර 05 තුළදී කි්‍රයාත්මක කිරීමට නියමිත උපාය මාර්ගික සැලසුම් ගොවි බිම හා ඒකාත්මික කරමින් උපරිම ඵලදායිතාවක් ඇතිකරගනු වස් ක්ෂේත්‍රයේ සමස්ත මානව සම්පත් අභිප්‍රේරණය කර නව ජවයකින් ඉලක්ක ගත සංවර්ධනය උදෙසා ප්‍රවේශවීම මෙහි අරමුණයි.

හොඳම දිස්ත්‍රික් කාර්යාලය, හොඳම ගොවිජන සේවා මධ්‍යස්ථානය, හොඳම කෘෂිකර්ම පර්යේෂණ හා නිෂ්පාදන සහකාර කොට්ඨාශය, හොදම ගොවිජන බැංකු නියමු ව්‍යාපෘතිය, හොඳම කාන්තා ක්ෂ්ද්‍ර මූල්‍ය සමිතිය, හොඳම ගොවි සංව්ධානය, හොඳම ගෙවත්ත, හොඳම ගොවියා, ගෙවිලිය ඇතුළු තරඟ 18කට අදාළව ස්ථාන 03 ක් සඳහා සහතික පත්, සම්මාන හා ත්‍යාග ලබාදීම මෙහිදී සිදු විය.

හොදම ගොවිජන සංවර්ධන ප්‍රාදේශීය නිලධාරියා සහ දිවයිනේ හොදම දිස්ති්‍රක් ගොවිජන සංවර්ධන සහකාර කොමසාරිස්වරයාට හිමි ජනාධිපති සම්මාන ජනාධිපතිතුමා අතින් පිළිගැන්විණි.

ගොවිජන සංවර්ධන කොමසාරිස් ජනරාල් ඩබ්.එම්.එම්.බී. වීරසේකර මහතා විසින් මෙහිදී “ගොවිජන අභිමන් 2018” සමරු කලාපය ජනාධිපතිතුමා වෙත පිළිගැන්වීය.

මෙහිදී ජනාධිපතිතුමා වෙත ද විශේෂ සිහිවටන තිළිණයක් පිළිගැන්විණි.

අමාත්‍ය පී. හැරිසන්, රාජ්‍ය අමාත්‍යවරුන් වන දිලිප් වෙදආරච්චි, වසන්ත අළුවිහාරේ, අමිර් අලි යන මහත්වරුන් ද, බස්නාහිර පළාත් කෘෂිකර්ම අමාත්‍ය ගාමිණි තිලකසිරි මහතා ඇතුළු පළාත් කෘෂිකර්ම අමාත්‍යවරුන් ද, ජනාධිපති ලේකම් උදය ආර්. සෙනෙවිරත්න මහතා ඇතුළු අමාත්‍යාංශ ලේකම්වරුන් සහ ගොවිජන සංවර්ධන කොමසාරිස් ජනරාල් ඩබ්.එම්.එම්.බී. වීරසේකර මහතා ඇතුළු නිලධාරිහු මෙම අවස්ථාවට එක්ව සිටියහ

Leave a Reply

Your email address will not be published. Required fields are marked *

%d bloggers like this: