ගෝටාට විදෙස් ගත වීමට අවසර

 

හිටපු ආරක්ෂක ලේකම් ගෝඨාභය රාජපක්ෂ මහතාට විදේශගතවීමට අවසර ලැබී ඇත.

ඒ සඳහා පනවා තිබූ තහනම තාවකාලිකව ඉවත් කිරීමට කොළඹ  ත්‍රීපුද්ගල විශේෂ මහාධිකරණය නියම කර තිබේ.

ගෝඨාභය රාජපක්ෂ මහතා වෙනුවෙන් පෙනී සිටි නීතිඥවරු අධිකරණය හමුවේ ඉල්ලීමක් කරමින් තම සේවාදායකයාට මේ මස 26 වනදා සිට අප්‍රේල් මස 12 දක්වා කාලසීමාව තුළ විදේශ ගත වීමට අවශ්‍ය ඇති බවත් ඒ සඳහා දැනට අධිකරණය මඟින් පනවා තිබෙන විදෙස් ගමන් තහනම තාවකාලිකව ලිහිල් කරන ලෙස අධිකරණයෙන් ඉල්ලා සිටියේය.

එම ඉල්ලීම පිළිගත් අධිකරණය අදාළ කාලසීමාව සඳහා ගෝඨාභය රාජපක්ෂ මහතාට විදේශගතවීම සඳහා අවසර ලබාදුන් අතර අධිකරණය භාරයේ පවතින ඔහුගේ විදේශ ගමන් බලපත්‍රය මුදා හැරීමට ද නියම කළේය. මෙම නඩුව අද(15) කැඳවූ අවස්ථාවේදී සම්පත් අබේකෝන් (සභාපති), සම්පත් විජේරත්න සහ චම්පා ජානකී රාජරත්න යන ත්‍රිපුද්ගල මහාධිකරණ විනිසුරු මඩුල්ල විසින් මෙම නියෝගය කරනු ලැබුවේය.

මෙම නඩුව අද කැඳවූ අවස්ථාවේදී විත්තිකරුවන් කිහිපදෙනෙකු වෙනුවෙන් පෙනී සිටින අනිල් ද සිල්වා සහ කාලිංග ඉන්දතිස්ස යන ජනාධිපති නීතිඥවරු මූලික විරෝධතාවක් මතුකරමින් මෙම නඩුවට අදාළ චෝදනා ගොනු කර ඇති ආකාරය අපරාධ නඩු විධාන සංග්‍රහයට පටහැනි බව ප්‍රකාශ කළේය.

නඩුව නැවත ලබන 28 වනදා කැඳවීමට නියම කළ ත්‍රිපුද්ගල මහාධිකරණ විනිසුරු මඩුල්ල එදිනට මෙම මූලික විරෝධතාව සම්බන්ධයෙන් නීතිපතිවරයා ගේ ස්ථාවරය ඉදිරිපත් කරන ලෙස නියෝග කළේය.

ඉකුත් රජය සමයේ මැදමූලන ප්‍රදේශයේ දී ඩී. ඒ. රාජපක්ෂ අනුස්මරණ කෞතුකාගාරය ඉදිකිරීම සඳහා ඉඩම් ගොඩ කිරිමේ හා සංවර්ධනය කිරීමේ සංස්ථාවට අයත් රුපියල් මිලියන 33.9 ක මුදලක් යොදවා එම මුදල සාවද්‍ය පරිහරණය කළ බවට චෝදනා කරමින් ගෝඨාභය රාජපක්ෂ මහතා ඇතුළු විත්තිකරුවන්ට එරෙහිව පොදු දේපල පනත යටතේ නීතිපතිවරයා මෙම නඩුව පවරා ඇත.

 

LEAVE A REPLY

Please enter your comment!
Please enter your name here